القلـب قلبـك .. والمشاعـر مشاعـرك
إجـرح وعــذّب ياحبيـبـي حـلالـك!

غالي ولو تخطي على القلـب .. عـاذرك
سوّ الذي يرضيك .. واللـي فـي بالـك!

خابرني ميّت فـي غرامـك .. وخابـرك
تموت في حـبّ التملـك .. وأنـا لـك!!

إن كنت صاحي .. مع خيالـك أسامـرك
وإن نمت .. في حلمي يجينـي خيالـك!!

يعني على كيفك .. وذوقـك .. وخاطـرك
أجيـك أنـا كلـي .. وكلـي فـدالـك!!

أموت في غيضـك .. وعقـدة نواظـرك
وأموت في صدّك .. وأمـوت بوصالـك!
!
وأموت في همسك .. ليا جيـت أحـاورك
وفي دهشتـك .. لاقلـت أدوّر بدالـك!!

وأموت لاشـع الضيـا بأجمـل صـورك
وأغيب معها .. وألتهـي فـي جمالـك!!

وتقول وش رايـك؟؟ وأقـرّب وأشـاورك
أنـت الله أعلـم وش نهايـة دلالـك؟!!

ياأنـي بمـوت وبندفـن فـي محاجـرك
أو يمكن أحيا .. وأنهبـل فـي هبالـك!!!

وتضحك .. وتفـرج بالسعـاده سرايـرك
وأنا على ضحكة شفايفـك .. هاااالـك!!

ذوّبتنـي مابيـن ملحـك .. وسـكـرك
وأهديتني قلبك .. وروحـك .. وحالـك!!

أقـدّر جهـودك فـي حبّـي .. وأقـدّرك
وأسكّنـك بيـن الحنـايـا لحـاااالـك!!

ومنّي جزيل الشكر .. والقلـب يشكـرك
على سمـوّك يالغضـي .. وإكتمالـك!!

سبحان من كمّل وصوفـك .. وصـوّرك
وخـلاّ مجالـي يندمـج فـي مجالـك!!

إن غبت عنّـي قمـت أهوجـس وأدوّرك
وأنشد عن ديارك .. وأجـي وآعنالـك!!

وإن جيتني برضاك .. ماجيـت مجبـرك
يامرحبـا .. والقلـب فـزّ ودعـالـك!


بس أنت تكفى دامنـي صـرت شاعـرك
إن غاب زوولك .. لايغيييييب إتصااااالك!!!