][ آخـر سِكّـةْ طعـوني ][


وفيت ب أوّل دروبي .. وخنتني بَ آخر المشوار

يا آخر سِكّة طعوني وذنب اوّل مشاويري


خطاي اني بنيتك "حلم" كبير بخطوتين قصار


وجيت اكبر من احلامك عليك وقلت لك طيري


تِشكّلت على هيّئة براءه والنوايا كبار


وصدقتك على النيّه.. ورحت اجني مخاسيري


تأملتك عمر ثاني -ملكته- والسنين بكار


يلقحها الوفا لكن .. صحيت وخاب تصويري


هقيتك اجمل اقداري / لقيتك اقبح الاقدار

عمتني طيبة ظنوني... ولا طابت تدابيري


نسيت ان الصدر اصغر مساحه ل أكبر الاسرار

وانا لا جابني سري ؟ تركته في صدر غيري!


عجب ! شفت الزمن غابه كبيره والبشر اشجار

وانا كني غصن ذابل .. خانتني عصافيري


عجبّ! كيف القلوب احيان تسرق رقة الازهار

وهِيّ أصلاً حجر ينبض (كيان) ان صَحْ تعبيري


عجب! وجه الطريق اسْود .. ذا خاين وذا غدار

كأني بينهم [غلطة] وعجزت افهم تفاسيري !


عطيتك للاسف ديره تمنتها قلوب كثار

بها شمس وقمر لجلك ... تِسير لقولتك سِيري


وبها جال وبحر يخفي حِكايات وكثير اسرار

وبها ارض ٍ تصير أطلال .. اذا قلتي لها صيري


وبها جروح والم واحزان تسالني عن الخطار

وعَلىّ اني بغيتك لي.. تجيني كل مساييري


على كل حال خسرتيها ولا باقي من اللي صار

سوى (دمعة) عليك اضْحَتْ تِشيل اسوأ مقاديري


أبرحل واترك أحلامي تسولف عن غريب الدار

عن آخر سِكّةْ طعوني وذنب اوّل مشاويري..؛


بخطاي اني بنيتك "حلم" كبير بخطوتين قصار

وجيت اكبر من احلامك عليك .. وقلت لك طيري !