شعر للشاعر المبدع سالم سيار
الله يخلي قلمه
=-=-=-=-=-=-=-=-=-=
كل ماطار الفراش أعرف إن أمي طفت
يمه ويني ؟؟.. يمه .. يمه ويني
نامت سنيني علي تلتحف من برد عمري
مامعي إلا عيونك .. تقطر الدمعه في بالي
تطفي البرد ويجيني زولك بداخل عيوني
أحضن عيوني وأنام
تهزهزي البرواز أدري
صح يمه ؟؟
مثل ماكنت اتهزهز باغنياتك
يمه نامي تمشط الصوره عيونك
مجدله شيبك تقولي آآآآآه يانثر نتثرته
تفتحين كروت عرس وترسمين بشوت عرسي
ألبس الاسود في بالك
ألبس البني في بالك
ألبس الابيض ترفضين
الكفن يطري في بالك
صح يمه ..؟؟
يمه أدري همك هو وجودي
هو زواجي
تشوفي عيالي وتموتي
غربيني لالمحتي شروق ربعي
تلملميني من زوايا البيت حتى
تتجه للقبله روحك
تلتقي وياها روحي
بكل صلاه
واعرف انك بآخر ايام الضوى
طافي فيك الفراش
كل ماطار الفراش اعرف ان امي طفت
ضايقه من التنك يومه
ايه انا ادري ضايقه من التنك يمه
كحتك كنها بصدري
آه لو اني عنك شلته في ضلوعي
وجيت اسيل
صدق تعالي
موعدك عند الطبيب
اذكر إني مسجله في شهر تسعه
رحتي يمه ولا طاف ؟؟
لايطوووف
أدري ماعندك يايمه
غيري أحد ياخذ الكرت ويجدد كل مواعيد الطبيب
يمه نامي .. يمه .. يمه نامي
الأسر هو نام فيني
والله مايقوى يزعزع شخص رابع من حليبك
او يمس يايمه شعره
شعره من ونات شيبك
قولي أقدار وخذتنا رحنا أسرى
ويعني أسرى
ماهو لازم مثل هذا اليوم نعرف
من عدوك من صديقك
يعني أسرى
يعني جوع ماأجوع
وانتي اصلا تذكرين
عزة النفس ويميني
ماوصلت أكل ٍ ولو هي
نفسي تدفعني عليه
يعني حريه يايمه
اجمل الحريات والله
إني اغيث كل عمري
ولايتضايق صدر شارع
من رئة خطوات شارع
طاته مسلم مانطق الا الشهاده
باصبعه ووقف فجر
لاغسلك الدمع يمه قولي فدوه
فدوه لعيون الشواطي لاغسلها المد قامت
توقظ الناس الناس بفرحها
بعد ماكانت حزينه
ادري همك هو زواجي هو وجودي
بتشوفي عيالي وتموتي
مثل همي إني اشوفك قبل مايطير الفراش
خلي همك إني طالب يد بلادي
ومهرها أبقى أسير
حتى لو طار الفراش
....
انت وينك ؟؟ انت وينك
من زمان كنت أدور في وجيه الناس عنك وجهي
ولالقيتك
في زوايا البيت أدور
في الشوارع في الصباح الي تشرب غترتك
بالمكان الي فرشته بالجريده
لما تقراها وتشرب كل صباحي قهوتك
آخذ الفنجان حتى تقرى حظك لي عجوز
ترفع البسمه تقول فيها لك شي يتحقق
وفيها له شي ثمين
ليه ماقلتي فيها لي شي بيتهدم
وفيها له شي حزين
أدري كنتي تكفرين
إنت وينك تسأل الأشجار عنك
لما ترمي فوق ظلها كل ظلك
لما تسقيها بدمك هي تبلك
تنحني لك
تدري إنك لو تغيب ينكسر طير
وتموت
إسأل الأيام عني
اسأل شفاهن هجرها
من بعادك ماي بارد
ليه تتركني أتوسل
واتسول في عيون الناس
اطلب منهم حفنة حنان
انت وينك ماتركت إلا بعباتي
عطر جسمك من صلاتك
شعرتين بكف مشطك
صافني وسط بالي
واتذكر .. يالله يمه .. يالله يمه اخطبيلي
والا يعني ماني رجال بعيونك
شفتي شعرك الا افله الا افله في زواجي
انت وينك هذي دارك ماتغير شي فيها
هذا بوكك هذا عطرك هذا مشطك
الا ساعه يوم طاحت من يديني اتكسرت
لاتخاف جبت ساعه تشبه الي تكسرت
انت وينك ماتركت الا عيونك داخل البرواز
تتبع وجهتي من وين أروح
ماتركت إلا عيونك داخل البرواز تسأل
يمه ويني
إنت وينك ؟؟
=-=-=-=-=-=-=-=
بصراحه قصيده معبره وقد تكون مبكيه
اترك لكم الحكم
فمان الله
